AC/DC confirma’l so regresu a la música con nuevu álbum

AC/DC confirma’l so regresu a la música con nuevu álbum
05 ochobre 19:38 2020 Imprimir

Dempués de selmanes llanzando pistes nes sos redes sociales, los australianos AC/DC confirmaron esta selmana pasada que tornen a la música cola so formación orixinal y un nuevu álbum que previsiblemente va llevar el títulu de “PWR UP”.

“¿Táis preparaos?”, publicó la banda nes sos redes sociales xuntu al lema PWRUP y una semeya de la que va ser la nueva composición de la banda colos sos integrantes orixinales: el vocalista Brian Johnson, el baterista Phil Rudd y el baxista Cliff Williams, amás de Angus Young y Stevie Young nes guitarres.

Esa xunta paecía imposible años tras, dempués de la muerte del guitarrista y fundador del grupu Malcom Young en 2017, xusto un añu dempués de que Johnson abandonara la última xira de la banda en 2016 por problemes d’audición (foi reemplazáu por Axl Rose de “Guns N’ Roses’ en delles feches).

La última década nun foi fácil para la formación. La so batería Phil Rudd recibió delles condenes por posesión de drogues y amenaces, que lu llevaron a estremase de la música, ente que Cliff Williams tamién dixo adiós polos problemes qu’acarretaba’l grupu.

Una vegada axuntaos de nuevu, sacante Malcom Young (reemplazáu pol so sobrín Stevie), los cantares que AC/DC publiquen van ser les sos primeres composiciones orixinales dende’l discu que llanzaron al mercáu en 2014, “Rock or Bust”.

L’anunciu de la xunta nun vieno acompañáu d’una fecha de publicación nin d’un senciellu d’adelantu, polo que se desconoz en qué momentu los sos siguidores van conocer en qué trabayen los llexendarios roqueros.

Dellos medios, como la revista Variety, señalaron que’l regresu coincide col 40 aniversariu del so discu más esitosu “Back in Black”,  ente qu’otros consideren que la nueva música podría coincidir con un homenaxe a Malcom Young, quien finó’l 18 de payares de 2016.

Nacíu na ciudá escocesa de Glasgow en 1953, Malcolm emigró en 1963, con tan solo diez años, a Australia con parte de la so familia y foi na ciudá de Sídney onde fundó, una década dempués, AC/DC xuntu col so hermanu Angus.

De magar, AC/DC vendió más de 200 millones de discos per tol mundu, ente ellos 71,5 millones de copies tan solo n’Estaos Xuníos, y ye xuna de les formaciones musicales más populares del planeta.

  Categories: