Portada Turismu Abre’l primer muséu submarín d’Europa en Lanzarote

Abre’l primer muséu submarín d’Europa en Lanzarote

by redacción asturnews

El Muséu Atlánticu de Lanzarote abrió les sos puertes dempués de qu’el so ceador, l’ecoescultor británicu Jason deCaires, y el presidente del Cabildru de la isla, Pedro San Ginés, somorguiárense xuntos a 14 metros de fondura sol mar pal tradicional corte de cinta nes sos instalaciones.

“Espero que’l Muséu Atlánticu de Lanzarote constituya un portal escontra otru mundu y fomente un meyor entendimientu del preciosu mediu marín y de la nuesa máxima dependencia d’él” señaló DeCaires dende’l fondu marín de la badea de Les Coloraes, al sur de Lanzarote.

Tres un brinde y un pequeñu percorríu poles instalaciones del muséu submarín, Pedro San Ginés espresó’l so prestu pola culminación de “un proyectu d’esti valumbu, que foi, antes de la so inauguración inclusive, un elementu de proyección internacional de la marca Lanzarote d’incalculable valía”. “Y que, a partir de güei, va apurrir un valor añedíu notable a la imaxe turística de la isla”, añedió.

La conseyera de Turismu, Cultura y Deportes del Gobiernu de Canaries, María Teresa Lorenzo, allabó tamién esta iniciativa, que calificó como un esponente de les sinergias” que pueden crease ente’l turismu, la cultura y el deporte, auníes nesti proyectu.

“Turismu, porque se trata de daqué curioso pa los visitantes de tol mundu; cultura, porque’l so artífiz ye d’unu de los ceadores más relevantes de la escena actual; y deporte, porque va impulsar la industria del bucéu, el ‘snorkel’ y el saléu, que son deportes náuticos, unu de les pilastres de la ufierta de les isles más allá del sol y la sablera”, argumentó.

Tamién te podria gustar