Ablucante votación nel Congresu sobro les propuestes de presupuestu pala Academia nel 2014

20 11:47 2013 Imprimir

El Congresu de los Diputaos trató durante los caberos díes distintes enmiendes presentaes polos grupos parllamentarios en rellación colos Presupuestos Xenerales del Estáu del añu viniente y refugó les dos presentaes por Foro ya IX empobinaes, dambes les dos, a dotar d’un presupuestu estatal d’unos 145.000, nel casu de FORO, y 75.000 nel d’IX a l’Academia de la Llingua Asturiana, privada de dineru públicu estatal por nun ser l’asturianu una llingua cooficial. Lo ablucante ye que votaron a la escontra UPyD y ERC, mentantu’l PSOE s’amosaba favoratible.

Na votación de la enmienda presentada pol diputáu de Foro Enrique Álvarez Sostres, los representantes políticos nel congresu español votaron mayoritariamente a la escontra de la propuesta, colos votos negativos de PP, UPyD y ERC, sorprendiendo esti últimu casu, ya que la formación independentista catalana refugó la propuesta, votada a la escontra polos sos 3 diputaos, cuando otres vegaes manifestárase favoratible a tener bon tratu pa col asturianu.

Na enmienda de FORO prodúxose l’abstención de Gaspar Llamazares, diputáu d’Izquierda Xunida pola circunscripción asturiana, y únicu representante del grupu parllamentariu “Izquierda Plural” que nun votó a favor de la midida, sigún desplicó porque nun recibió la propuesta de Foro. Llamazares votó favoratiblemente la enmienda d’IX. A lo postrero, l’Academia de la Llingua siguirá ensin recibir un solu céntimu por parte del estáu español nel PXE pa 2014.

Los representantes de Izquierda Unida y de Foro Asturias en el Congreso de los Diputados presentaren en so día dos enmiendes pa que los Presupuestu Xeneral del Estáu de 2014 incluyera una partida pa la Academia de la Llingua Asturiana. El forista Enrique Álvarez Sostres pidía 143.000 euros ya IX reclamaba 75.000.

  Categories:
Loading Facebook Comments ...