Abiertu’l plazu de matrícula nos Talleres Infantiles d’Avilés pal branu

Abiertu’l plazu de matrícula nos Talleres Infantiles d’Avilés pal branu
21 mayu 10:26 2018 Imprimir

Hasta’l 14 de xunu va tar abiertu’l plazu de matrícula nos Talleres Infantiles d’Avilés pal branu, onde va haber amás 11 beques de duración selmanal pa ufrir una mayor flexibilidá a les families. La programación ta basada n’actividaes lúdiques, deportives y artístiques, incluyendo serviciu de comedor y bonificaciones.

Los Talleres Infantiles d’Avilés  (TIA) celébrense, un añu más con una ufierta a les families que per segunda vegada amplíase a los meses de xunu y setiembre (del 22 de xunu al 7 de setiembre), partiendo les feches en veces selmanales cubriendo asina tol períodu de vacaciones escolares. Nesta edición, y al igual que mientres el pasáu branu, programáronse veces d’una selmana de duración cada unu d’ellos para ufiertar una mayor flexibilidá a les families.

Como ye habitual, los TIA ufierten serviciu de comedor y bonificaciones a les families en función de la so renta. Inclúi actividaes lúdiques, deportives y artístiques nos colexos El Quirinal (C/ Fernando Morán s/n) y Versalles (C/Reconquista 23) de 7:30 a 15:30 hores.

Los talleres tán destinaos a neños y neñes que cursen Infantil o Primaria nel momentu de formalizar la matrícula y que sos padres/madres tean empadronaos o trabayen n’Avilés. Los precios públicos en función de la modalidá escoyida son los siguientes: matrícula ensin comedor: 9,6 €/día y matrícula con comedor 13,55 €/día.

La matrícula ta abierta hasta’l 14 de xunu nes modalidaes online en www.aviles.es/TSAviles  (namái pa matrícules que nun soliciten bonificación) y presencial nos Servicios d’Atención Ciudadana (S.A.C.) allugaos na Casa Consistorial del Conceyu y nel Centru de Servicios Municipales d’El Focu (Villalegre) n’horariu de 8,30 a 14,30 hores y los  martes y los xueves n’horariu ininterrumpíu dende les 8:30 hasta les  17 hores.

Más información y matrícula

  Categories: