Abiertu’l periodu de propuestes ciudadanes pa los Presupuestos Municipales d’Avilés 2017

Hasta’l 15 de xunu va tar abiertu’l periodu de propuestes ciudadanes pa los Presupuestos Municipales d’Avilés 2017. En septiembre van llevase a cabu alderiques ciudadanos nos que se van priorizar les propuestes más interesantes pa los barrios y la ciudá, mentantu que nel 2015 definiéronse 9 actuaciones como prioritaries tres los alderiques.

Yá s’atopa abiertu’l periodu de propuestes ciudadanes pa incorporar a los presupuestos municipales de 2017. Tolos avilesinos y avilesines que tengan interés en plantegar dalguna midida o actuación que consideren necesaria na ciudá van poder tresmitila pal so alderique al traviés del portal avilesparticipa.org.

Pa facilitar la unviada de propuestes, habilitóse una senciella aplicación que cualquier persona puede rellenar. Puede aportase a ella a traves d’esti enllaz directu: http://avilesparticipa.org/participa-en-la-aportacion-a-los presupuestos municipales-de-2017/.

Consensuáu por entidaes y persones a títulu individual, el procesu d’aportación de propuestes ciudadanes a los presupuestos municipales d’Avilés consta de delles fases:

De primeres, un grupu de 21 persones, representantes de los 4 Conseyos de Zona, va dir recibiendo les propuestes ciudadanes pal so estudiu per parte del personal técnico municipal. Darréu, sobre les propuestes que se consideren vidables, van realizase alderiques ciudadanos, que la so celebración ta prevista pal mes de setiembre. Esti pasu garantiza que se prioricen aquelles propuestes que se consideren más interesantes pa los barrios y la ciudá.

Nel añu 2015 presentáronse un total de 50 propuestes ciudadanes que s’aldericaron y priorizaron, llogrando mayor puntuación les siguientes:

Zona 1.- El Pozón, La Lluz, Llaranes, y Villalegre:

1. Restauración de Murales del Colexu Públicu de Llaranes.

2. Arreglu de les canches coloraes de Llaranes.

3. Meyores de equipación del Centru Cultural de La Lluz (Biblioteca).

Zona 2.- La Madalena, Miranda, La Carriona  y El Carbayedo:

1. Instalación d’ascensor na Casa Consistorial pola entrada principal.

2. Ampliación de la zona infantil de xuegos del Parque del Carbayedo.

Zona 3.- El Arbolón, San Pedro Navarro, Valliniello, Versalles y Avilés Centro

1. Plan de Movilidá.

2. Instalación de rampla p’accesu al Centru Cívicu de los Canapés.

Zona 4.- Xardín de Cantares, La Maruca, San Cristóbal, El Nodo, Sabugo El Quirinal y parte d’Avilés centro

1. Señalización inclusiva d’edificios públicos.

2. Dotar d’un recursu d’agospiamientu temporal pa les persones que salen de prisión y nun cunten con sofitos familiares nin con recursos económicos.

Toles actuaciones propuestes en 2015 van ser atendíes gracies al plan d’inversiones municipal, qu’apocayá se dio a conocer nes xuntes de los Conseyos de Participación, sacante la instalación d’un ascensor nel edificiu del Conceyu, que la so execución presenta dificultaes técniques.

Dende los Conseyos de Zona animar a tola población a participar nesti procesu p’apurrir propuestes al presupuestu municipal de 2017, utilizando’l portal avilesparticipa.org, o contactando coles entidaes de cada zona al traviés de la Conceyalía de Participación Ciudadana, allugada na cai Rivero, 52 tercer planta (teléfonu: 985129098, corréu electrónicu: participacionayto-aviles.es).