Portada Educación Abiertu’l plazu pa inscribise nos cursos de la Universidá Asturiana de Branu

Abiertu’l plazu pa inscribise nos cursos de la Universidá Asturiana de Branu

by asturnet

Del 30 de xunetu al 10 d’agostu de 2012 van celebrase nueve cursos en réxime d’internáu en Cangas del Narcea. Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. La matrícula ta yá abierta y hasta l’1 de xunu nel llar de l’Academia de la Llingua Asturiana. Los alumnos que participen nellos podrán algamar, respeutivamente, 6 y 4’5 creitos de llibre configuración.

Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

L’Academia de la Llingua Asturiana celebra estos cursos a comuña cola Universidá d’Uviéu y el Conceyu de Cangas, dientro de la so Universidá Asturiana de Branu (UABRA). La ufierta de cursos ta colgada na páxina web de l’Academia ya inclúi Cursos d’Estensión Universitaria dirixíos a los estudiantes de toles estremaes carreres universitaries, amás d’a otres persones ensin formación superior. La direición de los cursos, que se celebren en Cangas del Narcea ta al cargu del profesor y académicu Xosé Antón González Riaño.

Pa esta edición tán previstos los cursos yá tradicionales, (elemental, avanzáu y capacitación pa la traducción al asturianu) y otros centraos en cuestiones más concretes: Cursu de Comunicación Periodística, Internet y Escuela. Nueves aplicaciones socio-educatives, Ecoloxía y Mediu Ambiente n’Asturies, Cantares, bailles ya instrumentos musicales asturianos y un Cursu d’aniciu a la investigación dialeutal y de tradición oral.

Amás va celebrase una nueva fase del cursu de Capacitación en Gallego-Asturianu pa profesores.

Información de los cursos na páxina de l’ALLA

Tamién te podria gustar