Abierta la matrícula pa estudiantes en graos ensin llende d’accesu

La Universidá d’Uviéu abrió’l 1 de xunetu’l plazu pa matriculase en primer cursu d’estudios de Grau ensin llende d’almisión, esto ye, pa los mozos qu’apuerten per primer vegada a la Universidá, y pa siguir estudios yá empecipiaos de Grau. El plazu va rematar el 31 d’agostu a les 14:00 hores y tolos trámites pueden realizase online.Los alumnos de la Universidá d’Uviéu que deseyen cursar graos con almisión directa (ensin solicitú de plaza) o prosigan los yá empecipiaos van poder realizar los trámites online hasta’l 31 d’agostu a les 14 hores tanto no que cinca a la matrícula n’estudios de grau ensin llende d’almisión y siguir estudios de grau yá empecipiaos. Na matrícula de segundu y posteriores cursos de Diplomaturas, Llicenciatures ya Inxenieríes estos estudios disponen namái de matrícula n’escritoriu (secretaría).

La matrícula n’estudios ensin llende de places realízase al traviés de l’aplicación informática que s’activa pa esta fin y a la que puede aportase utilizando’l nome d’usuariu y la contraseña que se-y facilitara al estudiante nel momentu de la so matrícula na prueba d’accesu. A los graos ensin llende de places tamién apuerten directamente los alumnos que tean en posesión d’un títulu de técnicu cimeru de Formación Profesional, técnicu cimeru d’artes plástiques y diseñu, o técnicu deportivu superior.

La Universidá d’Uviéu cunta con 51 graos afechos al Espaciu Européu d’Educación Superior. La ufierta académica inclúi amás, graos billingües, que s’imparten en centros de los campus d’Uviéu, Xixón y Mieres, y dobles graos, en Matemátiques y Física; en Derechu y Alministración y Dirección d’Empreses; y n’Inxeniería Civil ya Inxeniería de los Recursos Mineru y Enerxéticu.