Aaron Paul (Pinkman) presenta en Sitges “‘El camín’ el filme de Netflix que sigue les andances del personaxe deda cuerda a Breaking bad

14 ochobre 10:13 2019 Imprimir

Foi la última estrella en llegar al festival de Sitges y la so presencia foi la que más espectación creó. Y ye que Aaron Paul dexó’l llistón bien alto cola so participación mientres cinco temporaes na esitosa serie Breaking Bad (2008-2013) y tien ensame de siguidores que nun se quixeron perder esti sábadu la so visita al certame para promocionar El camín: Una película de Breaking bad, el filme que sigue les fazañes del so personaxe Jesse Pinkman dempués de los acontecimientos del últimu episodiu de la xenial obra creada por Vince Gilligan.

Aaron Paul metióse a toos nel bolsu esbardiando simpatía y carisma na rueda de prensa para falar del filme que pudo vese en primicia en Netflix el pasáu vienres y que güei se proxectó en pantalla grande nel auditoriu del hotel Meliá Sitges. “Creo que ye’l fin para Jesse Pinkman”, dixo l’intérprete sobro’l papel que-y dio a conocer en tol mundu, “pero tamién lu dixi va seis años”, añedió sobro esti personaxe del que se sintió “tan afortunáu” de dar vida.

So la dirección de Gilligan, que-y propunxo esti proyectu va dos años y que nun duldar n’aceptar “porque siguiría a Gilligan hasta’l fin del abilsu y nun tien que convenceme de nada”, la película tien el propósitu de dar al públicu un “bon zarru” porque xuna entruga constante que siempres rondó nel aire yera saber qué pasara con Pinkman. Paul consideró que conocía a Jesse cuando lleó’l guión del pilotu, pero dempués de 62 capítulos esta hestoria ayudó-y a ponese na piel de les sos situaciones problemátiques. “Entremos nun nuevu capítulu qu’amuesa l’infiernu y la tortura que traviesa esti personaxe”. “El final ye preciosu, 100% acertáu”, opina.

Sobro’l secretismu qu’arrodió’l proyectu y especialmente la so trama, aseguró que foi fácil caltenelo de callao porque “amo los secretos, les sorpreses y les mentires inocentes”, dixo con una amplia sorrisa. Sobro Bryan Cranston, qu’interpretaba a Walter White na serie y col que caltien xuna gran amistá, tuvo palabres emponderadores.

  Categories: