A qué hora y ónde ver l’eclís llunar esti vienres

27 xunetu 15:50 2018 Imprimir

La Lluna llena d’esti vienres 27 de xunetu va asitiase alliniada cola Tierra y el Sol, y va quedar xusto dientro de la solombra del nuesu planeta ye’l fenómenu conocíu como eclís total llunar que va ser el más llargu de tol sieglu XXI  y va vese n’Asturies si los cielos acompañen.

Anque cada 29 díes tenemos al nuesu satélite en fase llena, nun asocede un clise tolos meses por cuenta de que la órbita llunar ta esviada unos 5 graos al respective de la órbita de la Tierra en redol al Sol. Asina que solamente cada dos años, de media, suelse producir l’alliniadura fayadiza para dar llugar a un eclís llunar.

La Lluna llena d’esti vienres 27 de xunetu va presentar l’eclís llunar más llargu de tol sieglu XXI. La fase total del eclís, cuando la Lluna atópase totalmente somorguiada na solombra terrestre, va durar 1 hora y 43 minutos. En bona parte, esto ye porque la Lluna va tar nel momentu del eclís abargana del apoxéu, el puntu más cercanu a la Tierra de la so órbita. La fase parcial que preciede y sigue a la totalidá podrá vese una hora antes y dempués, aprosimao.

Los eclises llunares namái son visibles dende una parte del planeta. Al asoceder siempres nel momentu de la lluna llena, cuando’l nuesu satélite asitiase en dirección opuesta al Sol, los eclises llunares pueden vese dende tola zona de la Tierra onde ye de nueche nel momentu del eventu. Nel casu del eclís d’esti vienres, podrá guardase enteru dende bona parte d’Asia y África. Dende los países europeos l’eclís yá empezaría cuando la Lluna apaeza sobre l’horizonte y dende bona parte de la península ibérica l’eclís total va tar xustamente empezando al salir la Lluna pol horizonte, un momentu que promete ser inolvidable. Al asoceder en víspores de la fin de selmana, entamu de vacaciones pa munchos, y xusto de primeres de la nueche, ye un espectáculu celeste que nun tenemos escusa pa dexar pasar.

Pa ver l’eclís nun precisamos nengún preséu ópticu, anque un pequenu telescopiu o unos prismáticos pueden ayudanos a ver los detalles de la Lluna y la forma de la solombra terrestre sobre ella. Lo que sí ye imprescindible ye buscar un llugar eleváu o bien frente al mar, dende onde tengamos bona visibilidá, ensin torgues escontra l’horizonte sur-esti. Ye perhí por onde va salir la Lluna, yá parcialmente clisada, poco dempués de les 21h. La hora esacta depende del llugar. Por casu, dende Barcelona va vese apaecer la Lluna sobro’l mar a les 21h y 7 minutos. y dende Asturies vamos tener qu’esperar unos cuantos minutos más pa ver empezar l’espectáculu.

La solombra terrestre va despintar dafechu la Lluna a les 21:30, momentu nel qu’empieza la fase total d’esti eclís, de la que vamos poder esfrutar hasta les 23:13. Ye bien interesante afitase en el color qu’adopta’l nuesu satélite nel momentu de la totalidá del eclís y ye que la Lluna non desparecerá por completu, sinón que va quedar somorguiada nuna tenue lluz anaranxao. Esto ye porque parte de la lluz del Sol se refracta na atmósfera de la Tierra y proxéctase sobre la zona de solombra onde s’atopa la Lluna. Al penerar la lluz solar na atmósfera, el tenue llume del satélite nel momentu de la totalizad ye d’un tonu anaranxáu o acoloratáu.

Una vegada termine l’eclís total, la lluz solar va dir allumando progresivamente la Lluna (la fase parcial del eclís), hasta quedar totalmente fora de la nuesa solombra poco dempués de medianueche.

  Categories: