8 obres opten al Premiu Montesín de Lliteratura Xuvenil

La nueva edición del Premiu Montesín de Lliteratura Xuvenil, que convoca la editorial Trabe cola collaboración de la Oficina de Política Llingüística, recibió 8 obres qu’optarán a esti premiu que la editorial Trabe recupera. La prósima selmana conoceráse la obra ganadora d’esta nueva edición d’esti premiu de lliteratura xuvenil.

Les obres presentaes a esti premiu son: Estrella y la so nube (novela), El misteriu del Vassilius Destounis (novela), L’aventura de Mhino (novela), El secretu de la cámara de cuarzu (novela), El Club Social d’Altos Vuelos (novela), Marte muertu (teatru), Futuru mitolóxicu (poesía) y Khaos (novela).
El xuráu d’esta nueva edición del Premiu Montesín ta compuestu por Severino Antuña, coordinador de publicaciones infantiles y xuveniles d’Ediciones Trabe; María Xosé Rodríguez, directora de la Oficina de la Llingua del Ayuntamientu de Xixón; Esther Prieto escritora; Luís Casteleiro, escritor y filólogu de la Conseyería de Cultura; y Antón García, d’Ediciones Trabe, que fará de secretariu.

El premiu ta dotáu con 2.500€ y la publicación de la obra o les obres ganadores. Esti ye’l premiu de mayor cuantía na modalidá de lliteratura xuvenil d’Asturies.