Portada Educación 56 alumnos del Conservatoriu de Xixón, ensin docente «por un problema burocráticu»

56 alumnos del Conservatoriu de Xixón, ensin docente «por un problema burocráticu»

by redacción asturnews
Foto: Dibus y Deabus (https://www.flickr.com/photos/dibusydeabus/)

Un mes dempués del entamu del cursu académicu, 56 alumnos del Conservatorio de Música de Xixón entá nun tienen profesor asignáu pa la materia Llinguaxe Musical. Asina lo denuncien los padres de los estudiantes implicaos, qu’apuren a la Conseyería d’Educación y Cultura a tomar les midíes oportunes pa poner fin a esta esmolición.

«Nun hai profesor porque hai un problema burocráticu de personal docente. Ye grave porque esta situación ta condergando a los nuesos fíos al fracasu académicu», esplica Juan Pablo Riega, padre d’un alumnu afectáu. En total, asegura, el problema afecta a 56 alumnos de cuatro cursos de primeru a cuartu d’enseñanza elemental.

«Engataos». Asina se sienten los padres y tutores de los alumnos que nun pueden recibir les llecciones de l’asignatura pola que pagaron. «Tien un componente d’estafa porque los padres paguemos por una asignatura de la que nun tán recibiendo’l serviciu», amiesta Juan Pablo Riega. Lo peor, según les sos palabres, ye la falta de previsión que va pasar factura a munchos d’estos alumnos.

Ello ye que dalgunos deberán presentar llueu a un test d’accesu a enseñances profesionales: «Esta asignatura ye una de les troncales, de les básiques. Hai 16 alumnos de cuartu que dientro de cinco meses van tener un importante exame y non puede tolerase que por motivos de burocracia nun vaigan recibir estos conteníos».

La Conseyería d’Educación y Cultura ye, según los afectaos, la principal culpable d’esti contratiempu. «Si’l conseyeru d’Educación, Genaro Alonso, decidió nun cubrir esti puestu’l responsable ye namái él», critica Riega.  Mientres pasen los díes siguen a la espera d’una respuesta contundente y eficaz de la Conseyería que dexe a los estudiantes aportar a l’asignatura de Llinguaxe Musical. «Como padres, nun queremos saber si podría habese fechu d’una manera. Lo único que queremos ye defender los derechos de los nuesos fíos», remata.

Tamién te podria gustar