Portada Educación 5.000 profesores opten a 250 cátedres de Secundaria tres 20 años ensin convocase

5.000 profesores opten a 250 cátedres de Secundaria tres 20 años ensin convocase

by redacción asturnews
Foto: srgpicker (https://www.flickr.com/photos/srgblog/)

Depués de venti años, el Gobiernu rexonal inclúi 250 cátedres de Secundaria na ufierta d’emplegu públicu de 2017 que se va executar en 2018 y a les que se calcula que van presentase alrodiu 5000 profesores.

Les últimes oposiciones a catedráticu d’institutu convocaranse n’Asturies en 1998. Agora, venti años más tarde y dempués de que cinco comunidaes autónomes sacaren a concursu públicu les sos respectives places dende 2007 a 2009 (Cataluña, Galicia, La Rioxa, la Comunidad Valenciana y Murcia), el Gobiernu rexonal inclúi 250 cátedres de Secundaria na ufierta d’emplegu públicu de 2017 que se va executar en 2018.

Según la plataforma pro-cátedres de Secundaria, hai 5.000 profesores esperando por esta oportunidá, que solo representa’l 5% de les places de promoción interna. Nesti intervalu de tiempu, vieron cómo compañeros d’otres autonomíes fixéronse buecu n’Asturies al tratase d’un cuerpu de funcionarios de calter estatal y que pueden llograr plaza nel concursu de tresllaos.

Consciente de les mires qu’hai, el colectivu convocó ayeri una xunta nel institutu Alfonso II d’Uviéu pa conocer les demandes de los aspirantes y que’l baremu sía lo más xusto posible al tratase d’un concursu de méritos. Nesti sentíu, recuerden que’l real decretu d’accesu recueye trés apartaos. Dientro de los años de serviciu, esíxese un mínimu d’ocho años de desempeñu como profesor de Secundaria y valorase ser director d’institutu, xefe d’estudios o secretariu. Pero lo que pidieron los docentes ye que se tengan tamién en cuenta otros cargos, como xefe de departamentu y ser tutor, amás d’impartir docencia en delles especialidaes, el ser inspector, asesor técnicu docente, miembru del conseyu escolar o ser evaluáu pol Serviciu d’Inspección.

En cuanto al segundu -el de cursos de formación realizaos-, el real decretu establez trés puntos por 1.500 hores reconocíes (el máximu),  ente que’l terceru fai mención a Méritos académicos, artísticos y otros. Nesti capítulu la plataforma tamién fai aportaciones. Amás de los que recueye la normativa (ser doctor o tar en posesión de títulos de Música, Danza, la Escuela Oficial d’Idiomes, ser técnicu de FP o técnicu deportivu superior), el colectivu plantega que se tengan en cuenta los años de serviciu realizaos en cuerpos inferiores (Primaria, por casu), impartir cursos a otros profesores (Universidá o nos Centros de Formación de Profesoráu) o habelos empobinao, ser profesor d’enseñanza billingüe o coordinar esti plan.

Agora, recoyíes toles reivindicaciones, van solicitar una xunta col nuevu director xeneral de Personal Docente, Manuel Villar, pa face-y les llegar. Cree esti colectivu que sí puede haber consensu al respeutu. La baremación ta prevista pal periodu entendíu dende setiembre a avientu de 2018 pa nun interferir nes oposiciones de Secundaria y FP, que van tener llugar d’abril a xunetu de 2018.

Tamién te podria gustar