La 40 Selmana de les Lletres va dedicase a la música asturiana

La Conseyería d’Educación y Cultura va dedicar a la música asturiana de los postreros cuarenta años la 40 edición de la Selmana de les Lletres Asturianes, que va desenvolvese na cabera selmana d’esti mes d’abril y la primera de mayu.

El Principáu considera que’l llabor de los profesionales de la música en favor de la normalización llingüística ye un fechu que merez la reconocencia institucional y popular, según apuntaba la nota de prensa cola qu’informó la Conseyería del programa de la Selmana de les Lletres, xusta y casualmente, el mesmu dia en que la Xunta pola Oficialidá presentaba la manifestación del día 6 d’abril en Xixón.

Dende el 26 d’abril al 9 de mayu van desenvolvese distintes actividaes, dende talleres a esposiciones, homenaxes, presentaciones de llibros, llectures públiques, certames y concursos lliterarios, alcuentros escolares, entregues de premios, conciertos o representaciones teatrales.

L’actu inaugural de la Selmana, l’Alba de les Lletres Asturianes, va celebrase’l 26 d’abril, a los siete de la mañana, na escuela de Llorgozana (Carreño). Ese mesmu día, a les 20 hores, nel Nuevu Teatru de La Felguera (Llangréu), va tener llugar la gala del XI Premiu al Meyor Cantar. Mientres les siguientes feches, los conceyos de Ribesella, Siero, Uviéu, Corvera, Grau, Xixón, Avilés y Tapia de Casariego van acoyer diverses actividaes.

Nel Día del Llibru Asturianu, el 4 de mayu, quien merque llibros o discos n’asturianu o gallego-asturianu va recibir de regalu un doble CD con una selección de 40 cantares representativos de la hestoria de la música nestes llingües.