4.000 estudiantes afectaos pol retrasu de la EBAU

4.000 estudiantes afectaos pol retrasu de la EBAU
19 marzu 09:48 2020 Imprimir

Un total de 4.000 estudiantes van tar afectaos pol retrasu de la EBAU, qu’entá nun tien nueva fecha, magar los rectores pidieron que se realice, como mui tarde, la primer selmana de xunetu. Por mor del coronavirus la Universidá vieno acabante suspender tamién les elecciones del 21 d’abril.

Foi una de les primeres cuestiones que se punxo sobro la mesa cuando decidió cerrase tolos centros educativos: la prueba d’accesu a la Universidá, la EBAU. Polo xeneral, los docentes siempres punxeron de manifiestu que ye complicáu acabar a tiempu el temariu de segundu de Bachilleratu, con un calendariu bien afechu. Si amás sumir xuna suspensión de les clases de siquier dos selmanes (tou fai indicar que van ser más), la cuestión complícase. La conseyera d’Educación, Carmen Suárez, dexó claro dende’l principiu que si había que retrasala, fadríase.

Asina se decidió ayeri na xunta telemática celebrada ente los ministerios d’Educación y Universidá, xuntu colos responsables educativos de les comunidaes autónomes y rectores, «cola fin d’evitar perxuicios al alumnáu ante la crisis del COVID-19».

Va Haber EBAU esti cursu, pese al parón de les clases, pero aplázase so convocatoria, nel casu d’Asturies, onde hai unos 4.000 alumnos afectaos (200.000 en tol país), la prueba ordinaria de la EBAU taba afitada pa los díes 3, 4 y 5 de xunu, ente que la estraordinaria diba celebrase’l 30 de xunu y el 1 y 2 de xunetu. Los escenarios que s’embaraxen pasen por retrasar dambes convocatories.

Pero enagora nun hai una nueva fecha fita, anque los rectores solicitaron esti día que la prueba realícese, a lo más, la primer selmana de xunetu, por qu’avague les correcciones y el restu del procedimientu necesariu antes d’empecipiar el cursu siguiente. Pero agora tien de ser la comisión que se va a crear pa estudiar la tema la que proponga’l nuevu calendariu.

Dase la circunstancia de que p’aprobar el nuevu calendariu va haber que modificar la orde ministerial del 17 de febreru. Un mes xustu duró la convocatoria. Va Haber que determinar les nueves característiques, diseñu y conteníu de la evaluación, pero solu basándose na escepcionalidá de la situación.

El Gobiernu rexonal pidió «tranquilidá» al alumnáu de segundu de Bachilleratu y encamiénta-yos a siguir, na midida de lo posible, cola so preparación.

Per otru llau, el rector, Santiago García Granda, comunicó la suspensión de les elecciones al rectoráu, que taben previstes pal próximu 21 d’abril. Enagora, el mesmu Granda y Francisco Villaverde amosaren la so intención d’optar al cargu.

  Categories: