Educación recibe un 66% de los PGE asignaos al ministeriu de Méndez de Vigo

Educación recibe un 66% de los PGE asignaos al ministeriu de Méndez de Vigo
02 xunu 09:06 2017 Imprimir

Dos de cada trés euros de los presupuestos asignaos al Ministeriu d’Educación, Cultura y Deporte correspuenden a la partida educativa, un 66% del total (2.209 millones d’euros), lo que para Íñigo Méndez de Vigo reflexa l’apueste del Gobiernu pola igualdá d’oportunidaes y la calidá.

Na so defensa de les cuentes del so Departamentu nel Congresu, Méndez de Vigo recordó esti día que s’amontó nun 2,40% el presupuestu d’educación y destacó l’aumentu hasta los 1.523 millones d’euros para la partida de beques, con una medría del 1,46% más que nel exerciciu 2016 (20 millones).

Nesta partida figuren les beques xenerales y de movilidá, les dedicaes al aprendizaxe de llingües estranxeres y el financiamientu destináu’l Programa Erasmus+, que pasa de 157 millones d’euros en 2016 a 178 millones anguaño. Sorrayó l’amenorgamientu de los docentes interinos, yá que cola tasa de reposición al cien per cien va llegase en trés años a una tasa d’interinidá del 8% cuando agora ta nel 20,5%.

Para la Secretaría Xeneral d’Universidaes afitóse un presupuestu global de 217 millones; nesti apartáu destacó la novedá del cambéu de les tases de la forqueta de los másteres habilitantes por que les comunidaes autónomes puedan menguar les d’estos títulos, que pasa de ser d’ente un 15 y 50%, frente al 40-50% anterior.

Dende’l Grupu Mistu, estes cuentes fueron refugaes por Oscar Matute (EH-Bildu), que resabia de la bonanza económica” referida pol ministru, al que dixo nun entender “por qué si esto ye asina, el presupuestu que presenten ye un 20% menos qu’el qu’había en 2009 o’l 2010″.

A Javier Sánchez, de Xuníos Podemos, paez-y qu’estes cuentes nun sirven pa faer lo que’l Gobiernu “diz que quier faer” y resolver los problemes estructurales de la educación n’España.

Tampoco-y gusten les cuentes pa Educación al socialista Manuel Cruz, que nun entiende por qué’l ministru faló de “presupuestu alcista cuando retayó los sos propios retayos” y manifestó que “nun son el meyor marco pa un Pactu Educativu, nel que toos los comparecientes reclamen meyores recursos”.

  Categories: