Portada Cine El Radiovisor avilesín dedica’l so espaciu a la heroicidá

El Radiovisor avilesín dedica’l so espaciu a la heroicidá

by redacción asturnews

Héroes y heroínes de ficción, de lleenda ya inclusive de la cotidianidá protagonicen el nuevu programa d’El Radiovisor en YouTube, que ye la cara más visible del proyectu audiovisual del Colexu Públicu Virxe de les Marees d’Avilés.

Daniel Ortuño presenta y dirixe esti espaciu que, nesta ocasión, cuntó cola participación d’Iris, del Colexu Publico d’Educación Especial San Cristobal; Érik, del Colexu Públicu La Carriona-Miranda; y Yeiko, del Colexu Publico Virxe de les Marees. Los grandes collaboradores del programa enfrentaronse al concursu que’l periodista David Ortuño preparó para la ocasión.

Nel programa, Meri va cuntar les sos aventures na facultá d’estudios d’heroicidá. Amás los grandes collaboradores del programa van responder sobro cuálos son los sos héroes y heroínes favoritos de ficción, del día ente día y en qué considérense superhéroes. Amás de les intervenciones de los grandes y pequenos amigos d’El Radiovisor de carne y güesu, nesti programa nun podía faltar la nota d’humor del queríu personaxe de felpa, Unxa, el youtuber troglodita, que va cuntar cómo son les figures más almiraes pol so valor na prehistoria.

El Radiovisor algama’l so undécimu programa desque se punxo en marcha. Tratase d’una iniciativa audiovisual del colexu públicu Virxe de les Marees y forma parte del proyectu de tresformamientu del centru educativu públicu del barriu d’El Nodo. Cuenta pa ello col sofitu ya impulsu del Conceyu d’Avilés, l’asociación Nómades, la Conseyería d’Educación del Principáu d’Asturies y l’Universidá d’Uviéu.

Daniel Ortuño, director y presentador d’El Radiovisor, ye llicenciáu n’Imaxe (UCM) y posgráu en realización audiovisual (Universidá Ramon Llul). Ye’l ceador y presentador del programa La Radio del Cole de Onda Madrid (premio Infancia 2019 de la Comunidá de Madrid). Dirixió’l documental sobro pedagoxía activa ‘Botes y Zapatielles’. Trabayó n’Antena 3, Onda Cero y Europa FM y nes radiotelevisiones autonómiques públiques d’Asturies, Castiella-La Mancha, Madrid y Cataluña.

En televisión realizó los llabores de realizador, reporteru, cámara o montador y, en radiu, de llocutor y de técnicu de soníu. Foi profesor de formación profesional reglada y ocupacional na familia profesional de comunicación imaxe y soníu. Dende fai 7 años forma a docentes y estudiantes en radiu y vídeu, amás d’asesorar na creación, puesta en marcha o meyora de radios y televisiones escolares.

Tamién te podria gustar