El 11 de xunu repartiranse 4.000 bollos nel Martes de Campu,

by redacción asturnews | junio 3, 2019 9:41 am

La Sociedá Protectora de La Balesquida va repartir el próximu 11 de xunu, Día del Martes de Campu, 4.000 bollos ente los sos socios por cuenta de la celebración d’una de les fiestes más tradicionales del calendariu uvieín. El programa festivu foi presentáu esta selmana pasada.

El presidente de la entidá, José Antonio Alonso, acompañáu de del vicepresidente, Javier Gómez Tuñón, y de la secretaria, Carmen López Villaverde, detallaron les actividaes que s’inclúin nel programa, col Martes de Campu, el 11 de xunu, como Día Grande, fecha na que’l Paséu del Bombé va acoyer la tradicional repartida: 4.000 bollos que podrán retirase de 9 a 13  hores. Tamién el 11 va celebrase la tradicional alborada musical poles cais de la ciudá, el festival del cantar asturianu, ‘XIV Memorial Ángel Martínez Suárez’, y la romería popular, nel  paséu del Bombé, dende les 19.00 hores y amenizada pola orquesta Fábula.

El programa de les fiestes de La Balesquida entamóp’l miércoles, col pregón de la presidenta de l’Asociación Española Contra’l Cáncer n’Asturies (AECC), Margarita Fonte Noriega, nel Teatru Filarmónica, a les 20 hores. Amás va haber un conciertu del Orfeón Principáu”, dirixíu por Patricia Miriam Iglesias.

El nomamientu de la Socia d’Honor 2019, qu’anguaño va ser la pianista Purita de la Riva, va tener llugar nel mesmu llugar, el xueves 5 de xunu, a les 20.15 hores. Tampoco va faltar anguaño la Cabalgata del Heraldu. “La Fama” y la so comitiva va percorrer, el domingu día 9, n’horariu de mañana, les cais de la Águila, Schulz, Porlier, Ramón y Cajal en dirección a Argüelles, cai del Progresu, Milicies Nacionales, Uría, Fruela, Pozos y plaza de la Constitución, onde va ser recibida poles autoridaes locales en redol a les 13.00 hores. Dende ellí y en recibiendo’l pertinente permisu pa celebrar el Martes de Campu, la Cabalgata va prosiguir por Cimadevilla y Rúa, rematando na plaza de Porlier.

El presidente de la entidá, José Antonio Alonso, adelantró que, nesta edición, nun va haber exhibición de cetrería y malabarismu al rematar L’Heraldu na plaza de la Catedral. “Tán en pleitu les obres que se realizaron na plaza y ta prohibíu faer cualquier eventu nel qu’haya qu’asitiar casetes”, sorrayó.

Source URL: http://asturnews.com/28052019-4-000-bollos-paral-martes-de-campu-el-11-de-xunu/