Portada Escéniques Concha Velasco escosa les entraes nel so regresu a Avilés

Concha Velasco escosa les entraes nel so regresu a Avilés

by redacción asturnews

Concha Velasco escosa les entraes nel so regresu a Avilés con “El Funeral”. Encabeza una repartida con Jorge Sanz, Cristina Abá, Clara Alvarado y Emmanuel Medina como compañeros de cartelu, nuna comedia escrita y empobinada pol so fíu Manuel Velasco.

Laura Conti, l’actriz más grande d’España, del cine, del teatru, de la televisión, fina. El veloriu tien llugar nun teatru, y ellí, énte la so familia, énte los centenares d’almiradores que s’averen a despidila, apaezse fantasmagórica: quier y precisa resolver cuentes pindies. Asina empieza “El Funeral”, una comedia escrita a la midida de Concha Velasco, que torna a Avilés una vegada más, y failo con un Teatru Palacio Valdés llenu a trés díes de la función. Ésta, fora d’abonu de escenAvilés, va tener llugar esti vienres, 27 de xunetu, a les 21 hores.

El ritmu de vienta de les entraes foi incesante desque se punxeron a disposición del públicu nes canales habituales y, finalmente, colgóse’l cartelu de nun hai billetes. La llegada de Concha Velasco a Avilés vien precedida pol atayante ésitu de la xira por toa España, de llenu en llenu. Concha Velasco, la gran dama de la escena española, que la so sola presencia yá ye garantía d’ésitu de públicu, visitó na ciudá nos últimos años con obres como “Reina Juana”, “Hécuba” o “La vida per delantre”.

N’Avilés cayóse del cartelu de “El Funeral” Antonio Resines, por enfermedá. El so sustitutu ye unu de les cares más conocíes de l’actuación n’España, Jorge Sanz, que magar nun prodigase nel teatru, vuelve al Palaciu Valdés,  con “Arsénicu per compasión”, o en “Pequenos crímenes conxugales”.

“El Funeral” ye un testu de Manuel M. Velasco fechu pa la so madre, Concha Velasco, qu’encarna a la protagonista, una Lucrecia Conti que va protagonizar la so última apaición estelar nel so propiu funeral, entamáu pol Ministeriu de Cultura nun teatru. Les sos nietes, Ainhoa y Mayte traten de caltener la cordura énte l’ábanu de visitantes, ente los qu’apaez Miguel, un primu alloñáu. Lucrecia tien cuentes que resolver colos presentes, tamién col so representante, Alberto Luján, que trata de contener a la prensa. Ye’l postreru gran papel de Lucrecia, y va tratar d’aprovechalo. Los enriedos y situaciones xeneraes, sorpreses incluyíes, van atrapar al públicu hasta’l final, nuna comedia de ritmu vibrante.

“El Funeral” pertenez al Programa Estatal d’Artes Escéniques Platea, al que se sumó Avilés, y que yá dexó esfrutar nel Palaciu Valdés d’un espectáculu de danza, con “Vuelos”, y del teatru con “Toles nueches d’un día”, con Ana Torrent y Carmelo Gómez.

Tamién te podria gustar