25 mozos avilesinos participen esti branu en 3 intercambios internacionales

25 mozos avilesinos participen esti branu en 3 intercambios internacionales
18 xunetu 08:53 2019 Imprimir

Un total de 25 mozos d’Avilés participen dende esta selmana en trés intercambios xestionaos pola Oficina de Movilidá Xuvenil Internacional “Europa Equí”. Desenvuélvense en Portugal, Francia y Eslovaquia, n’estancies d’una selmana de duración.

Los distintos grupos, acompañaos por monitores, comparten esperiencies con moces d’otros países europeos y alderiquen sobro interculturalidad, diversidá sexual ya inclusión social, ente otros aspeutos.

Nes selmanes previes a la so participación nos intercambios, los y les moces recibieron preparación previa al traviés de clases d’inglés gratuites, formación intercultural y conocencia de la cultura local del país al que van viaxar. Amás apúrrese asesoramientu a les families en cuestiones relatives a la preparación del viaxe, l’equipaxe necesariu o la cobertoria médica.

Los y les participantes desenvuelven conxuntamente, col sofitu de monitores responsables, un programa de trabayu consistente en talleres, exercicios, alderiques, simulaciones, teatralizaciones y actividaes al campu qu’ellos mesmos diseñaron y preparáu antes del intercambiu.

Los intercambios xuveniles dexen a los mozos desenvolver competencies, sensibilizase sobro temes sociales y afayar nueves cultures, costumes y estilos de vida, principalmente al traviés del aprendizaxe ente iguales. El procesu realízase al traviés de métodos d’educación non formal.

La Oficina de Movilidá Xuvenil Internacional “Europa Equí” xestiona beques de movilidá pa moces d’Avilés dende l’añu 2006.

  Categories: