L’Entregu celebra Les Cebollles Rellenes esta fin de selmana

L’Entregu celebra Les Cebollles Rellenes esta fin de selmana
26 17:16 2015 Imprimir

Sidreríes y restoranes van sirvir el tradicional menú, animaos por un interesante programa cultural y festivu entamáu pola sociedá de festexos cola collaboración del Conceyu.

San Martín del Rei Aurelio aviva los sos fogones p’acoyer una nueva edición de les fiestes Gastronómiques de les Cebolles Rellenes, declaraes d’interés turísticu pol Principáu d’Asturies, que se va desenvolver del 27 al 30 d’esti mes, na localidá de L’Entregu.

Alredor d’una trentena de restoranes, sidreríes y vinotecas van ufiertar un menú contundente y con muncha personalidá, compuestu poles clásiques cebolles rellenes de bonitu, ración de dureces y casadielles, regáu con vinu o sidra. Los comensales van poder esfrutar d’estos platos, a un preciu similar en tolos locales hosteleros, alredor de los 20 euros, o tastiar namái’l platu de cebolles rellenes.

Cebolles rellenes servíes nuna mesa

Les cebolles rellenes protagonicen la fin de selmana

Les previsiones apunten a que se van espachar más de 10.000 quilos de cebolles a lo llargo de la fin de selmana. Los visitantes que s’averen a L’Entregu/ a tastiar el menú van poder amás esfrutar de los actos cultural y festivos que se programaron a lo llargo de la fin de selmana o aprovechar la estancia nel conceyu pa visitar el Muséu de la Minería y l’Industria, allugáu na mesma localidá.

Ente los actos festivos que amenizarán los festexos gastronómicos figura’l Concursu de Cebolles Rellenes, exhibiciones deportives, teatru, garabatu solidariu y fiesta nocherniega con música discu, tantu la nueche del vienres como la del sábadu, amás de les actuaciones del Coru San Andrés Sergio Domingo y la Banda de Música de Samartín del Rei Aurelio.

Na programación destaca pola so llarga tradición, el XXI Festival Folclóricu, entamáu pol grupu de baille L’Esperteyu, que va tener llugar el sábadu 28, a les 19 hores, nel Teatru Municipal. Los anfitriones cunten anguaño cola participación, como convidáu d’honor, del grupu de baile Villa de Cuellar, de Segovia. Dambos, van desfilar poles cais de la localidá y darréu van xubise a les tables del Teatru pa ufiertar el meyor repertoriu de los folclores asturianos y segovianos, hermanaos pol baille.

No deportivo, les fiestes recuperen anguaño’l popular Cross de Les Cebolles, el vienres 27 de noviembre, a les 20 hores, pa la categoría absoluta, y primeramente, a les 18 hores, pa les categoríes inferiores, entamáu pol Patronatu Municipal de Deportes. El percorríu ye de tres kilómetros y percorre les principales cais de la localidá.

Loading Facebook Comments ...