Avilés conmemora’l Día de la Tierra Palestina col plantíu d’un olivo n’El Carbayedo

Avilés conmemora’l Día de la Tierra Palestina col plantíu d’un olivo n’El Carbayedo
24 marzu 10:48 2018 Imprimir

Demientres la mañana del día 22 de marzu tuvo llugar l’actu de plantíu d’un olivu n’El Carbayedo pa conmemorar el Día de la Tierra Palestina y amosar la solidaridá de la ciudá d’Avilés con esti pueblu.

Afayose amás una placa ellaborada pola escuela de cerámica con un poema de Mahmud Darwish, poeta nacional palestín. Nel actu de plantíu del árbol participaron l’alcaldesa d’Avilés, Mariví Monteserín al pie de representantes del Comité de Solidaridá cola Causa Árabe d’Asturies (CSCA) y la Coordinadora de ONGD del Principáu d’Asturies (CODOPA) según representantes del Conseyu de Cooperación d’Avilés y del movimientu vecinal avilesín. L’acción foi propuesta al Conceyu d’Avilés por CSCA y CODOPA, quien apurrieron el olivo, símbolu de paz.

L’olivu álzase yá na isleta esistente nel entronque ente Doctor Severu Ochoa y Doctor Marañón, nuna zona primeramente acondicionada pol personal de Parques y Xardinos. Acompaña al árbol una placa de cerámica sobro un monolitu de formigón que fueron ellaboraos pola Escuela de Cerámica y los Servicios Técnicos municipales, respectivamente.

Na placa podrá lleese el siguiente poema de Mahmud Darwish, consideráu’l poeta nacional palestín y unu de los más célebres lliteratos árabes contemporaneos:

Pasaxeros ente palabres fugaces,
coláivos de la nuesa tierra,
del nuesu suelu, del nuesu mar,
del nuesu trigu, del nuesu sal,
de les nueses feríes, de too…
Coláivos de les alcordances de la memoria,
pasaxeros ente palabres fugaces.

La conmemoración del Día de la Tierra Palestina ye una actividá de suma importancia pal pueblu palestín. Tratase de la fecha na que ríndese homenaxe a la tradición y al enraigonamientu que representa la tierra palestina, como símbolu imperecederu d’una cultura milenaria.

El día 30 de marzu de 1976 el gobiernu israelín decidió confiscar 2.100 hectárees de les tierres de dos aldegues del territoriu vecín. Esti proyectu foi refugáu con fuelgues y manifestaciones en contra del plan de Tel Aviv y en defensa del espaciu. Les manifestaciones fueron reprimíes violentamente per parte de la policía y l’exércitu israelín, lo que provocó decenes de muertes y cientos de persones mancaes y deteníes. Les movilizaciones estiéndense per otres aldegues y los palestinos y palestines orixinarios de Cixordania y la Franxa de Gaza na diáspora, solidaricense colos sos paisanos.

A partir d’entós añalmente celébrase esti día que llamen “Día de la Tierra Palestina” y que se convirtió nun símbolu de reivindicación de los derechos lexítimos del pueblu palestín.

  Categories: