Asterix aporta’l 22 d’ochobre con 1500 álbumes n’asturianu

Asterix aporta’l 22 d’ochobre con 1500 álbumes n’asturianu
24 setiembre 13:21 2015 Imprimir

“El papiru de César” ye’l títulu que va tener n’asturianu’l nuevu álbum d’Astérix que va ver la lluz a nivel mundial el próximu 22 d’ochobre de 2015 y del qu’estos díes se conocieron viñetes y dellos otros detalles.

El nuevu guionista Jean-Yves Ferri y el dibuxante Didier Conrad, que tomaron el relevu de la famosa serie de cómic creada por Albert Uderzo y René Goscinny, avanzaron yá detalles na Feria del Llibru de Bolonia, como que van ponese a la vienta más de 4 millones d’álbumes en tol mundu traducíos a 20 llingües distintes, llegando a España 160.000 exemplares en castellán, 25.000 en catalán, 4.000 en *euskera, 3.000 en gallegu y 1.500 n’asturianu.

Portada de la Web del nuevu álbum d'Asterix

Web del nuevu álbum d’Asterix

Per otru llau, tamién se dio a conocer al villanu de la hestoria, qu’en castellán va ser llamáu Bonus Promoplús y de xuru que tamién n’asturianu. El personaxe va ser un asesor de Julio César encegoláu con desaniciar dafechu l’aldega d’Astérix y Obélix.

El guionista Jean-Yves Ferri, autor de l’anterior aventura ‘Astérix y los pictos’ y el dibuxante Didier Conrad almitieron inspirase nel famosu publicista francés Jacques Séguéla, que como’l so personaxe cunta tamién na realidá con un venceyu políticu yá que foi’l director de la campaña presidencial de Mitterrand en 1981.

Amás, nuna entrevista emitida por Uderzo a Europe.fr, el dibuxante comentó que’l relatu taría asitiáu tantu na Galia como en Roma. Dica agora nun hai más información al respective, anque s’anunció la llegada de nuevos detalles mientres la rueda de prensa que se va facer el 12 d’ochobre. La editorial creó una web na que va dir informando de futures actualizaciones: www.asterix36.com

Loading Facebook Comments ...