21.669 persones visitaron los museos d’Avilés en 2015

A lo llargo del pasáu añu, 21.669 persones pasaron polos museos del conceyu d’Avilés, una medría de más dos mil visitantes sobre l’añu 2014, cuando fueron 19.443., y un porcentaxe d’aumentu del 11,5%.

La conceyala de Cultura, Yolanda Alonso, destacó  esta selmana al presentar los datos “la bona salú de los equipamientos, l’interés d’avilesinos y visitantes pola hestoria de la ciudá, la calidá de les esposiciones temporales programaes y el llabor d’espardimientu y promoción per parte del serviciu de Cultura y, en concretu, del responsable de dambos equipamientos, Manuel Ángel Hidalgo Menéndez”.

El Muséu de la Hestoria Urbana d’Avilés, asitiáu na cai de la Ferrería, recibió la visita de 17.367 persones a lo llargo de 2015, un 7,3% más que l’añu anterior cuando fueron 16.180. Esti fechu paez responder a una serie de circunstancies entamando pola producción o esposición en collaboración con otros centros de diverses esposiciones temporales, como les dedicaes a los 750 años de la estancia de los Franciscanos n’Avilés, a la presencia de la familia avilesina Galé nel Xapón de principios del sieglu XX, la realizada con Nardo Villaboy con semeyes d’Avilés nel pasáu.

Otra causa de la medría de visites ta, ensin dulda, nel aumentu de l’actividá turística de la ciudá. Nel cómputu añal, el 24,3 % de los visitantes vien de fora d’Asturies. Concretamente 753 estranxeros pasaron poles instalaciones a lo llargo de 2015, destacando en primer llugar los procedentes de Francia (125), siguíos polos d’Estaos Xuníos (105), Gran Bretaña (70), Portugal (68), Arxentina (58) México (48), Italia (41) y Alemaña (41).

El Centru d’Interpretación del Campusantu de la Carriona (CICLAC) tuvo mayor crecedera porcentual, fundamentalmente por cuenta de la consecución de los premios al tercer meyor campusantu y primero n’escultura d’ente tolos campusantos españoles entamáu por revistir Adiós Cultural. Amontó l’interés y la valoración d’avilesinos y visitantes sobre la importancia histórico y monumental del campusantu de La Carriona.

De los 3.263 visitantes del añu 2014 (en 2013, primer exerciciu completu d’actividá, fueron 3.722), rexistráronse 4.302 nel apocayá concluyíu 2015, un 31,8% más. Tamién el programa de visites empuestes y l’afitamientu de grupos d’escolares y colectivos xeneraron una mayor arribación a les sos instalaciones.  Con independencia d’esta actividá propia del CICLAC, profesionales de les visites empuestes incluyeron na so ufierta la visita al campusantu.