Portada Educación 209 neños de 0 a 3 años en llista d’espera en Xixón

209 neños de 0 a 3 años en llista d’espera en Xixón

by redacción asturnews
Foto: nicholas.barker1997 (https://www.flickr.com/photos/146512011@N07/)

Ye una situación que se repite cursu tres cursu: Les 12 escueles infantiles de Xixón nun pueden atender tola demanda para escolarizar a los ñácaros y neños d’ente 0 y 3 años y hay 209 neños en llista d’espera.

Les 471 places qu’ufierten Atalía, Escolinos, La Serena, Los Pegoyinos, Los Playinos, Los Raitanes, Montevil, Nuevu Xixón, Nuevu Raspies, Tremañes, Vega La Camoha y Viesques nun son abondes. Finalmente, tres l’entamu del cursu, son 209 los neños que se quedaron en llista d’espera. Anque ye d’esperar que la cifra baxe un pocu más nos próximos meses, por cuenta de los neños entá non nacíos o naciellos que se van incorporar más avanzáu’l cursu. Sicasí, van siguir siendo munchos los que se queden ensin plaza nos centros públicos.

Asina se punxo esti llunes de manifiestu na Comisión d’Educación del Conceyu. Según informó’l voceru del grupu municipal de Ciudadanos, José Carlos Fernández Sarasola, el datalle de les cifres ye: 53 neños n’espera pal cursu de 0 a 1 años; 46 nel de 1 a 2 y 110 nel de 2 a 3. L’últimu cursu de les escueles infantiles ye siempres el que más demanda tien. «A pesar de la cayida de la natalidá esti serviciu sigue siendo altamente demandáu poles families xixoneses, por cuenta de les sos necesidaes pa conciliar y, sicasí, dende’l gobiernu local nun se fixeron apenes esfuerzos pa poder dar una respuesta fayadiza a esta demanda», critió Sarasola.

El voceru de Ciudadanos llamentó que «Foru nun fuera capaz de crear nin xuna sola plaza nueva de 0 a 3 años na ciudá», según los retrasos nes dos nueves escueles infantiles previstes, les de Contrueces y la que se va allugar nel antiguu colexo Cabrales.

Tamién te podria gustar