Los cursos de la UABRA entren na so segunda selmana

Esta selmana entama la recta final de los cursos de la Universidá Asturiana de Branu (UABRA) que se celebren en Cangas del 3 al 14 d’agostu, con actividaes complementaries y la presencia d’Asociaciones como Iniciativa pol Asturianu publicitando la so actividá ente l’alumnáu de los cursos.

L’Academia de la Llingua Asturiana organizalos en collaboración cola Universidá d’Uviéu y esti añu hai convocaos, amás de los cursos elemental y avanzáu, el de gallego-asturianu, el cursu de capacitación pala traducción, unu d’averamientu al cine, otru de Xestión cultural y otru alrodiu del usu d’Internet nes aules.

Los cursos desenvuélvense como tolos años na Escuela Hogar de Cangas del Narcea y tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como «Entidá Organizadora d’Actividaes de Formación Permanente del Profesoráu». Dende’l llunes pasáu, dientro de les Actividaes Abiertes de la UABRA, pue visitase la esposición «Equí y n’otru tiempu», de Ramón Lluis Bande, na sala d’esposiciones de la Casa de Cultura de la villa canguesa.

Y, como tolos últimos años, Iniciativa pol Asturianu tien instaláu un puestu informativu y de venta de productos nes instalaciones de la Universidá Asturiana de Branu, en Cangas del Narcea. Un espaciu pa dar a conocer la organización y facer socios ente los participantes nesta actividá entamada pola Academia de la Llingua Asturiana.