El Conceyu de Xixón habilita’l pabellón de La Tejerona pa les persones “ensin techu”

El Conceyu de Xixón habilita’l pabellón de La Tejerona pa les persones “ensin techu”
25 marzu 09:50 2020 Imprimir

El Conceyu de Xixón va habilitar el pabellón de deportes La Tejerona para allugar a les persones ensin llar. Asina se decidió esta mañana n’una xunta del grupu d’acción social, integráu pola Delegación del Gobiernu, el Gobiernu del Principáu, los conceyos de Xixón y Uviéu, Protección Civil d’Asturies y la Federación Asturiana de Conceyos.

El dispositivu va tar xestionáu permanentemente por Cruz Roja y Protección Civil y reforzáu por un serviciu de vixilancia del que s’encarga’l Conceyu de Xixón.

Tratase d’una midida qu’acaba de decidise y que yá ta en marcha. Nestos momentos, el pabellón yá foi desagafáu y tase asitiando’l bateco para cubrir el suelu. A primer hora de la tarde asitiaránse les 100 cames para les que l’equipamientu tien capacidá.

L’oxetivu ye dar abellugu a toles persones que tán na cai nestos momentos y tamién facilitar el llabor d’equipamientos como l’Albergue Cuadonga o la Cocina Económica.

Dende la Empresa Municipal de Tresporte Urbanu informen coles mesmes que, nel casu de los abonos mensuales, nel momentu en que remate l’Estáu d’Alarma, van contabilizase tolos díes que nun fueren operativos y van enllargase de forma automática.

  Categories: