Portada Educación 2.745 alumnos quedaron ensin plaza en Medicina, qu’esixe una nota de 12,51

2.745 alumnos quedaron ensin plaza en Medicina, qu’esixe una nota de 12,51

by redacción asturnews
Foto: Pablo Fernández (https://www.flickr.com/photos/hadock/)

Medicina recibió 2.895 solicitúes d’alumnos pa ingresar na carrera, cásique 700 más que va dolce meses, cuando se cerró la postrera de les convocatories de 2018. Teniendo en cuenta que la so ufierta llindase a 150 places, fueron 2.745 los que nun pudieron optar a los estudios deseyaos.

Bien ye cierto que bona parte de los pidimientos lleguen d’alumnos procedentes d’otres comunidaes que cumplieron con esti trámite en más facultaes de Medicina del país como una forma de garantizase una plaza na carrera de la so elección. La esperiencia demuestra que los que llogren plaza abargana de casa quedar con ella. El grau ta completu.

La Universidá d’Uviéu fixo pública ayeri la novena y última llista de persones almitíes en convocatoria ordinaria pa cursar estudios de grau; la séptima llista en convocatoria estraordinaria y la segunda en convocatoria de setiembre. Y, magar que la nota pa entrar en Medicina (nel supuestu de que pudiera faese dalguna axudicación) queda en 12.516, sigue siendo la más alta de los 58 títulos de la institución académica. En xunetu asitiábase en 12,79.

Sígue-y nesti llistáu de notes de corte’l doble grau de Física y Matemátiques, con un 12,252 y que tamién enllenó los sos 60 places en recibiendo 342 solicitúes. Odontoloxía, con una calificación riquida de 11,568, y pa la qu’entá queden puestos llibres de nuevu ingresu; Enfermería, con 11,5 y al completu; y Biotecnoloxía, que raspia’l llenu con una nota de 11,479.

Toes elles, xuntu con Psicoloxía, Fisioterapia y Alministración d’Empreses son carreres a les qu’optaron más d’un millar d’estudiantes y l’ufierta cubrióse, salvu en ADE, que corrió una suerte distinta. Ufiertaba 395 places y, según la última actualización de la Universidá d’Uviéu, tien ocupaes 253. Esto ye, 142 menos.

Son los estudios con más puestos llibres, siguíos de los de Derechu, con 122 vacantes (cuando ufiertaba 350) ya Inxeniería Mecánica, con 111 llibres en sacando 240. En total, de les 58 titulaciones de la institución académica, hai 38 nes qu’entá queden places vacantes.

Na rama de les inxenieríes, con notes de corte que se queden ente’l 5 y el 7,6, la inmensa mayoría dispon de vacantes. Tan solo hai trés que son la esceición: el nuevu grau qu’imparte’l campus de Xixón, Inxeniería d’Organización Industrial, completó la so ufierta de 60 places; Inxeniería Informática del Software, los sos 150; ya Inxeniería Informática en Tecnoloxíes de la Información, les sos 115.

Na rama d’Humanidaes llama l’atención la calificación riquida pa Filosofía, que según los datos que facilitó la Universidá d’Uviéu, queda nun 10,684. Raspia’l llenu. Nun ye’l casu de Xeografía y Ordenación del Territoriu, con trelce places llibres, y la segunda nota de corte más alta: 7,7. El plazu pa poder participar nesta última convocatoria -la primera tuvo llugar en xunetu- abrióse la fin de selmana y permaneció abierta hasta esti llunes, día 14. En concretu, hasta les dos de la tarde.

La Universidá d’Uviéu recuerda que quien nun formalice la matrícula nel periodu indicáu va dexar plaza llibre pa futures axudicaciones que, de forma estraordinaria, puedan producise a lo llargo del presente curso 2019-2020.

Tamién te podria gustar