Portada Conceyos Primital va actuar el 15 de xunu na Factoría Cultural d’Avilés

Primital va actuar el 15 de xunu na Factoría Cultural d’Avilés

by redacción asturnews

La programación musical d’Avilés sigue arriqueciéndose en tolos sos espacios escénicos con un nuevu conciertu del grupu madrilanu Primital el 15 de xunu na Factoría Cultural. La banda va presentar el so nuevu discu, “Primital Trek”.

La formación que lidera Santi Ibarretxe ta formada por Valentín Iturat (batería), David San José (teclaos y coros), Alberto Zapata (guitarra y coros) y José Ramón Abella (baxu). Va Presentar el so nuevu discu, “Primital Trek”. Súmase a los conciertos de Pokey LaFarge (7 xunu) y Beth Hart (9 payares)

Esti eventu, que va tener llugar a les 21 hores, anunciase tres la esitosa actuación de José Mercé nel Teatru Palacio Valdés y xúnese a los conciertos yá confirmaos de grandes artistes internacionales como son Pokey LaFarge (7 de xunu)  y Beth Hart (9 payares), que tamién van actuar nel coliséu avilesín.

Primital ye un proyectu lideráu pol madrilanu Santi Ibarretxe que, valiéndose de los ritmos de xéneros tan diversos como’l funky, la world music, el reggae o la electrónica, propón al públicu un viaxe ensin palabres al so propiu inconsciente. Ensin palabres porque la lletra” de les temes de Primital ta compuesta por onomatopeyes carentes de significáu aparente al traviés de les que convida al públicu a construyir el so propiu relatu.

A Santi Ibarretxe acompáñenlu Valentín Iturat (batería), David San José (teclaos y coros), Alberto Zapata (guitarra y coros) y José Ramón Abella (baxu). Les entraes pa esti conciertu van tar disponibles llueu nes canales habituales de vienta al preciu de 12 euros antemanada y 15 euros el día del conciertu.

Primital ye un conceutu artísticu musical creáu por Santi Ibarretxe nel 2004 en Madrid que naz de la busca d’una espresión musical  nueva, del pruyimientu de renovación y sorpresa nel panorama musical actual. L’ámbitu vocal yera’l fayadizu pa llevar a cabu esti suañu. Una y bones la voz, na so aguada jazzística universal foi unu de los preseos principales y mas usaos del autor a lo llargo de la so carrera.

Al respective de la esencia sonora, puede dicise que la idea primixenia ye utilizar testos onomatopéyicos con sonoridaes curioses que nun tienen por qué responder a un significáu intelectual y oxetivu. Ponse l’acentu na esperiencia plástica d’estos testos, de cutiu casi alienígenas.

Per otra parte, y falando de l’aguada psicolóxica, Primital recrea tou un estensu elencu de personaxes nos sos cantares, a los que s’introduz nun contestu musical vanguardista ya inesperáu bien versátil estilísticamente falando. Esto refléxase por casu nos cambeos que nun solu cantar pueden llegase a producir.

Los testos tienen la peculiaridá de conectar col subconsciente del oyente al reconocer esti nellos palabres y espresiones bien familiares salíes como por sorpresa de la nada. Amosando asina una vegada mas la llibertá na forma y composición de música y testu. Como resume, el conceutu Primital ye la creación d’un subuniverso sonoru paralelu extrañamente familiar al escuchu humanu; ye’l xardín del Edén onde l’arte nun precisa xustificación intelectual nin estilística pa esplegase a si mesmu.

Tamién te podria gustar