450 neños y neñes de 7 colexos participen nos Talleres de Sensibilización d’Igualdá

450 neños y neñes de 7 colexos participen nos Talleres de Sensibilización d’Igualdá
15 marzu 10:00 2018 Imprimir

Un total de 450 neños y neñes de primaria de 7 colexos d’Avilés participen a lo llargo d’esti mes nos Talleres de Sensibilización d’Igualdá entamaos pol Conceyu d’Avilés.

Los talleres formen parte del programa del 8 de marzu, Día Internacional de les Muyeres, n’Avilés y punxéronse en marcha “coles mires de favorecer el desenvolvimientu d’actitúes positives y relaciones igualitaries y superar los estereotipos acomuñaos a neños y neñes”, en palabres de la conceyala d’Igualdá, Raquel Ruiz.

Los talleres impartense nos distintos cursos de primaria pa desplicar, al traviés de dinámiques y xuegos afechos a les distintes edaes, los llogros que se consiguieron y les metes que queden por algamar pa llograr la igualdá real. Tienen una duración de 2 hores a lo llargo de les cualos afóndase na hestoria del 8 de marzu, nos roles de xéneru asignaos a lo llargo de la hestoria a homes y muyeres, y na igualdá d’oportunidaes na actualidá.

Esta actividá, gratuita, forma parte de la ufierta del Catálogu d’Actividaes Educatives Municipal y viense desenvolviendo dende principios de marzu cola participación de 7 centros educativos del conceyu d’Avilés y un total de 21 grupos de cursos de primaria.

Los alumnos y alumnes de 5º y 6º de Primaria de los Colexos Principáu, CEIP Palacio Valdés y CEIP Llaranes (tamién de 1º de Primaria) yá recibieron esta formación.

Más información

  Categories: