Portada Música L’Antigua Escuela Comerciu acueye un alcuentru cola soprano Beatriz Díaz

L’Antigua Escuela Comerciu acueye un alcuentru cola soprano Beatriz Díaz

by redacción asturnews

La cantante soprano Beatriz Díaz participa esta tarde, a les 20 hores, nuna charra-coloquiu entamada pola Sociedá Filarmónica de Xixón que va desenvolvese nel Espaciu Nuevu de l’Antigua Escuela de Comerciu.

Por cuenta de la Gala Llírica Asturiana», que va tener llugar el próximu miércoles, día 12, nel Teatru Xovellanos, la Sociedá Filarmónica de Xixón entamó un alcuentru previu cola protagonista del conciertu, Beatriz Díaz, nel Espaciu Nuevu de l’Antigua Escuela de Comerciu. Va Ser a les 20 hores y va tar moderáu por Ramón Avello y Eduardo G. Salueña, con entrada llibre hasta completar l’aforu.

«Alcuentru colos músicos» ye una iniciativa que naz como una propuesta de collaboración ente la Sociedá Filarmónica de Xixón y el Taller de Músicos de la Fundación Municipal de Cultura, Educación y Universidá Popular que trata d’ufiertar un acercamientu más próximu y personal ente’l públicu y dalgunos de los músicos que participen nos conciertos de la temporada de la Sociedá Filarmónica, contribuyendo de la mesma a la divulgación de la música clásica y a potenciar la esperiencia del conciertu en vivu al traviés del testimoniu directu de los mesmos protagonistes. Nesta ocasión la invitada ye la cantante asturiana Beatriz Díaz, que la so brillosa carrera como soprano llírica vieno evolucionando intensa y  progresivamente en mediu mundu.

El formatu escoyíu ye’l de charrar-coloquiu y dexa la intervención del públicu asistente, n’ares de caltener un diálogu fluyíu ente l’espectador y l’intérprete. Anque güei día podamos asistir a conciertos bien diversos dientro de la ufierta cultural de la ciudá, non siempres esiste la oportunidá d’intercambiar abiertamente impresiones ente l’artista y el so públicu. La propuesta nun s’amenorga puramente a los socios de la Sociedá Filarmónica, sinón que ta abierta a toles persones comenenciudes que deseyen asistir.

Tamién te podria gustar