Nueva edición de ‘Ciencia y Tecnoloxía en femenín’ pa combatir la fienda de xéneru

Nueva edición de ‘Ciencia y Tecnoloxía en femenín’ pa combatir la fienda de xéneru
09 ochobre 09:56 2020 Imprimir

Esti xueves entamaba’l proyectu “Ciencia y  Tecnoloxía en femenín” que, per tercer añu consecutivu, promueve l’Asociación de Parques Científicos y Tecnolóxicos d’España (APTE), de la que forma parte’l Parque Científicu y Tecnolóxicu Avilés Isla de la Innovación. L’oxetivu d’esta iniciativa ye visibilizar y promover los estudios en ciencies, tecnoloxía, ingeniaría y matemátiques ente les estudiantes de secundaria al traviés de diverses actividaes y eventos que se van desenvolver a lo llargo del primer trimestre del cursu escolar.

El programa ta dirixíu a moces estudiantes de 1º a 3º de la ESO y consiste nuna serie de workshops, esposiciones, concursos, y l’aportación d’una guía de salíes profesionales pa toles alumnes que tean interesaes n’estudiar carreres de ciencies y tecnoloxía y ayudar a combatir la fienda de xéneru qu’esiste nestes carreres profesionales.

La situación sanitaria motivada pola pandemia del Covid obliga a evitar los eventos presenciales y por eso la sesión inaugural  del proyectu, que se va desenvolver en streaming va poder ser siguida por tol públicu n’horariu de 9 a 11 hores na web del proyectu https://www.apte.org/ciencia-tecnologia-en-femenín y na canal de youtube  https://www.youtube.com/watch?v=6OwKq6fl_0s

Esta gran cita de presentación conxunta va empecipiar con una bienvenida per parte de Felipe Romera, presidente de APTE, y la presentación de la guía con exemplos de salíes profesionales d’estudios ‘STEM’ denominada “¿Qué quiero ser de mayor?”, per parte de Soledad Díaz, directora xerente de APTE.

La xornada va siguir con una sesión d’esperimentos, xuegos ya intereses de la mano de los divulgadores científicos Patricia Barciela y David Ballesteros, na que vamos ver  porqué la ciencia y la tecnoloxía pueden ser prestaes y apasionantes. Con una propuesta fresco y cargao d’humor, los dos divulgadores científicos van averar a la problemática del fomentu de les vocaciones científicu-tecnolóxiques ente les moces y los aspeutos que xeneren un déficit d’estudiantes universitaries nestos ámbitos. Pa ello, van romper roles y estereotipos, van averar a momentos estelares de la ciencia protagonizaos por científiques y van realizar esperimentos espectaculares.

A dicha actividá fueron convidaos tolos centros qu’imparten enseñances medies n’Avilés. A partir de la mesma convidaráse a participar a les estudiantes n’alcuentros con científiques ya investigadores de la redolada del PCT Avilés Isla de la Innovación y la so  respuesta a unu de los retos plantegaos nos Oxetivos de Desenvolvimientu Sostenible (ODS) fitos pola ONU, en concretu la perda de biodiversidá.

L’equipu qu’ellabore la solución más novedosa ya innovadora va participar na fase nacional del concursu, que va tener llugar na feria Talent Woman que se celebra en Málaga. Destacar que nes anteriores ediciones los quipos representantes d’Avilés, pertenecientes al IES Carreño Miranda, quedaron en segunda y tercer posición na fase final de la competición.

Tolos detalles del proyectu, xuntu con tola información y documentación de la iniciativa pueden ser consultaos na web :

https://www.apte.org/ciencia-tecnologia-en-femenino