El Festival de Teatru Amateur d’Uviéu amuesa l’apueste poles artes escéniques

Dende esti 4 d’agostu y hasta’l 9 de setiembre, nel Teatru Filarmónica, van representase les obres de les 17 compañíes (14 asturianes y 3 d’otres comunidaes) que van participar nel certame L’equipu de gobiernu destinó para esti festival 27.000 euros, de los 300.000 d’inversión nel actual presupuestu asignaos a les artes escéniques.

El conceyal de Cultura Roberto Sánchez Ramos, al pie de Carmen Suárez Trapiello y Miguel Peñáu, vicepresidenta y secretariu de FETEAS (Federación d’Asociaciones de Teatru del Principáu d’Asturies) presentaron esta selmana pasada na Casa Conceyu’l XI Festival de Teatru Amateur “Ciudá d’Uviéu”, que tamién tien anguaño proyección nacional (II Festival Nacional de Teatru Amateur “Ciudá d’Uviéu”).

El certame va desenvolvese nel Teatru Filarmónica, ente’l 4 d’agostu y el 9 de setiembre, con representaciones a les 8 de la tarde, sacantes les que se lleven a escena los domingos, que van empezar una hora antes. Van Participar 17 compañíes: catorce d’Asturies y trés que, nesta ocasión, provienen de Cantabria, Valencia y Castiella-La Mancha. Les entraes afitáronse al preciu de 6 euros.

El Conceyu apurre 27.000 euros pa esti festival. Roberto Sánchez Ramos destacó l’apueste pol teatru del actual equipu de gobiernu municipal comparando la inversión global realizada nel exerciciu de 2015 pol anterior equipu (95.000 euros), colos 300.000 destinaos nos presupuestos d’anguaño pa les artes escéniques. Cree amás que se ta recuperando’l Campoamor pal teatru, col enfotu de que vengan al principal espaciu escénicu uvieín la meyores obres que se representen n’España y añedió que, en curtia, va presentase un nuevu ciclu de teatru, similar al de proyecciones cinematográfiques al campu (“Cine a la lluz de la lluna”); tán estudiándose los posibles allugamientos por que’l teatru tamién tea na cai.

Los representantes de FETEAS avanzaron dellos detalles del Festival de Teatru Amateur. Carmen Suárez Trapiello destacó l’altu nivel de les compañíes participantes y los 17 premios que va tener el certame na so dimensión rexonal; y otru premio Escena Amateur al que tamién van optar los grupos veníos de fora de la rexón. Miguel Peñáu aprofió que’l programa del festival contien xuna ufierta variadísima: teatru risible asturianu, teatru costumbrista, contemporaneu, etc.; pero, percima de too, “teatru del bonu, al que ta convidáu tol públicu d’Asturies”.