Portada Escéniques El nuevu ciclu de escenAvilés va cuntar con 14 representaciones ente abril y xunu

El nuevu ciclu de escenAvilés va cuntar con 14 representaciones ente abril y xunu

by redacción asturnews

El nuevu ciclu de escenAvilés va cuntar con 14 representaciones ente abril y xunu y como novedá, les representaciones de la programación Platea integraranse nel abonu xeneral del ciclu.

El plazu de renovación d’abonos taba abiertu hasta’l 18 de marzu y ente’l 20 y el 25 de marzu punxéronse a la vienta los nuevos abonos con munchu ésitu y aceptación.  El restu de localidaes tan disponibles yá dende’l 27 de marzu a les 11 hores

Juan Mayorga, de quien se suel destacar que ye’l dramaturgu español vivu más representáu internacionalmente, caltién dende va años con Avilés estrechos venceyos qu’esti próximu mes d’abril reforzaranse cola concentrada presencia del autor y la so obra na ciudá:  El magu (Palacio Valdés, vienres, 26), Intensamente azules (Off, sábadu, 27) y el mesmu Mayorga invitáu pol ciclu Palabra (xueves, 25) del Centru Niemeyer.

En contrapartida, pa suplir el desconocimientu n’España d’otru autor, Ronald Schimmelpfenning, sicasí bien representáu nel so país, Alemaña, lléganos el 21de xunu Peggy Pickit ve la cara de Dios con calter d’estrenu absolutu. Y nesa mesma llínea, el Off del Niemeyer acueye otru estrenu más, Esta fame, del italianu Renato Gabrielli (11 de mayu). El franceses Jean-François Prévand con Voltaire/Rousseau (7 d’abril) y Sébastien Thiéry con ¿Quién ye’l Sr. Schmitt? (17 de mayu) completen la llista d’autores estranxeros ufiertaos nesta edición de primavera de escenAvilés. Pero a ellos, amás del yá citáu Mayorga, xúnese xuna bien representativa amuesa de la más actual autoría española: Lucía Carballal con La resistencia (7 de xunu), Mariano Barrosu y Alejandro Hernández con Toles muyeres (14 de xunu), Jose Padilla con Gris/Mar nel Off Niemeyer del 22 de xunu, y Eladio de Pablo y Antonio Álamu nel Palaciu Valdés (programación Fechu n’Asturies) con, respectivamente, -yos rellaciones pelligroses (15 de mayu) y En un llugar de la borrina (5 de xunu). Completa la cartelera teatral un clásicu, Moby Dick, en dramaturxa de Juan Cavestany sobro la famosa novela de Herman Melville, con un protagonista d’esceición: José María Pou (10 de mayu).

A lo último, el ciclu de Música n’escena, amás del habitual conciertu de la OSPA (25 d’abril) va cuntar con un perinteresante espectáculu de danza, Nacida solombra, al cargu de la Compañía de Rafaela Carrasco (31 de mayu).

Descarga equí la programación completa del ciclu

Tamién te podria gustar