Portada Cine “Cenizas del cielo” llega a los cines de tol estáu esta fin de selmana

“Cenizas del cielo” llega a los cines de tol estáu esta fin de selmana

by asturnet

Una nueva película rodada n’Asturies llega a les pantayes de los cines de tol estáu. El filme ye “Cenizas del cielo” y ta dirixíu por José Antonio Quirós y protagonizáu por Gay Piquer, Beatriz Rico y Celso Bugallo, ente otros. Na película participen amás artistes asturianos como Xuan Bello, que fizo la lletra de la banda sonora, Anabel Santiago, que la interpreta y Ramón Padra qu’adaptó la lletra a la so música.

La película presentóse yá n’Asturies y en Madrid y recibió dellos premios, ente otros sitios, nel Xapón o nel Festival de Cine de Mediu Ambiente. La película tien un tresfondu ecoloxista y cuenta la historia de los vecinos d’un valle asturianu que ven alteriaes les sos vides pola instalación d’una central térmica nel territoriu onde viven. «Cenizas del cielo» supón la segunda incursión de José Antonio Quirós nel cine de ficción dende qu’hai cuasi diez años llevara a les carteleres «Pídele cuentas al rey».

Como anécdota, na película apaez Carlos Madera faciendo un caméu. Nel momentu de la grabación Madera yera Director Xeneral de Cultura.

Esta ye la lletra de Xuan Bello escrita pa la película:

La Caricia de los árboles
Lletra: Xuan Bello (adaptación:
Ramón Prada)
Música: Ramón Prada
Medra la hedra, madre,
Medra la hedra abrazándome,
Ensin medrana, madre, abrazándome.
La hedra que m’afuega
Esguila aduces hacia la lluz
Pa que nun escaeza’l raigame.
Abrazo la nublina y abrazo nada.
Abrásome nel suañu de cada día.
Abrazo la nueche y ello m’abraza
Soi dafne: alluma la melanconía.
Medra la hedra, madre,
Medra la hedra abrazándome,
Ensin medrana, madre, abrazándome.
Abrazo la nublina y abrazo nada.
Abrazo la nueche y ello m’abraza.
Abrásome nel suañu de cada día.
Soi Dafne: alluma la melancolía.

Tamién te podria gustar