“La música que lleves adientru” trunfó nel so estrenu

13 avientu 11:40 2010 Imprimir

La Banda de Música de Corvera celebró esti sábadu les sos venticinco primeros años d’actividá con un conciertu nel que tuvieron por convidaos a dalgunos de los solistes más prestixosos de la música asturiana. Media hora enantes del entamu, una llarga filera de persones de toles edaes esperaba yá a les puertes de los Cines Box, en ParqueAstur, onde una de les sales se convierte en teatru al llevantar la pantalla onde se proyecten les películes.

La espectación yera grande y l’espectáculu nun defraudó, y eso pese a la falta a última hora d’una de les figures más esperaes, Chus Pedro, de Nuberu, que sustituyeron tolos artistes del espectáculu pa cantar la mítica “Danza del cuélebre”, de Víctor Manuel, que na voz d’Adolfo Camilo, Xune Elipe, Anabel Santiago y Xulio Antidio, consiguió calecer a un públicu predispuestu qu’aplaudió muncho a lo llargo de la tarde de música.

La orquesta, con más d’80 miembros nel escenariu, consiguió da-y lluz a cada cantar con desinfinidá d’instrumentos, bien empastaos. De los doce temes, cinco fueron instrumentales. Ehí echóse de menos sentir la música de Mecano, Abba, Queen o Michael Jackson n’asturianu, pero los amiestos de dellos temes de cada grupu fechos pola banda, dirixida por Francisco Revert, amosaben el bon facer d’una banda con un cuartu de sieglu al llombu.

Sicasí, los ésitos más aplaudíos fueron les verisiones d’“Embruxada”, de Tino Casal, fecha por Adolfo Camilo Díaz; “Tiempos nuevos, tiempos selvaxes”, d’Ilegales, qu’interpretó Xune Elipe; Xulio Antidio que versionó “Contigo o ensin ti”, d’U2 y sobremanera Anabel Santiago, que cola so impresionante voz fizo una estupenda versión de “Rehab” d’Amy Winehouse, cola que consiguió que tola sala saliera tatariando “non, non, nun voi…”.

En dellos temes instrumentales, versionando a Hevia y Ramón Prada, participaron tamién la Banda de Gaites Nerbia y el gaiteru Chus Gutiérrez, qu’amosaron otra vegada como la gaita empata perbién cola música d’una banda de música d’instrumentos clásicos.

La tarde pesllóse con un tema de Ramón Prada, perconocíu pola so emisión en televisión como banda sonora de sidra El Gaitero y un pequeñu actu nel que la conceyala de cultura de Corvera, l’alcalde y otres persones venceyaes a la banda entregaron unos regalos a los participantes y dieron un premiu por sorpresa a Aldolfo Camilo Díaz pol so apoyu a la Banda.

«La música que lleves adientru», cumplió coles espectatives, anque l’escenariu quedó pequeñu pa un espectáculu onde participaben cuasi un cientu de persones. Un trabayu d’estes característiques bien merecía una xira per Asturies, anque curiando, eso sí, la puesta n’escena, que tuvo más cercana a la de la grabación d’un discu nun teatru qu’a la d’un espectáculu como talu.

Asturnews ufre una galería de semeyes na so canal de Facebook

  Categories:
Loading Facebook Comments ...