‘Xixón de novela’ recueye testos de cuasi cuarenta autores de narrativa

21 mayu 23:50 2007 Imprimir

Redacción.

Ayeri pela tarde, nel Antiguu Institutu Xovellanos de Xixón presentóse ‘Xixón de novela, un percorríu lliteraraiu pela villa de les milenta histories’. Nel actu tuvieron presentes Ramón d’Andres, Xefe de Política Llingüística del Gobiernu d’Asturies y Mª Xose Rodríguez, responsable de la Oficina de la Llingua de Xixón y coordinadora de la obra, que comentó que la obra “quier que conozamos un migayu más esta ciudá de novela”.

Al actu asistieron munchos de los autores qu’apaecen na antoloxía de testos sobre la villa de Xovellanos, como ye’l casu de Xose Nel Riesgo, David Rivas, Humberto González, Helena Trejo, Vicente García Oliva o Xandru Martino Ruz, ente otros. Con una edición mui cuidada la obra recueye testos d’hasta cuasi cuarenta autores.

En llugar de la tradicional llectura, la Oficina de la Llingua de Xixón ellaboró un vidiu, onde dalgunos de los autores lleíen la so obra acompañaos poles imáxenes de Xixón. La presentación d’esti llibru ye’l penúltimu actu de la XXVIIII Selmana de les Lletres Asturianes, que va rematase güei nel Teatru Toreno de Cangas del Narcea cola presentación del númberu seis de la revista ‘El Regueriu’, editada pol CRA Ríu Cibea.

  Categories:
Loading Facebook Comments ...